Sometime water does clean up tings, but ah watching how water exposing some nastiness in de US - de land of de free and de home of de brave. Free for some yes, some more brave dan smart yes, but watch close. See if yuh spot de real damage dat Katrina do.

Santimanitay.

Fuh over ten years, ah hear how engineers tell de government dong dey, dat de sea walls need fixing. Dey sen’ paper and facks and suggestion. Nobody pay dem no mine.

Santimanitay.

Ah see when Katrina buss a lash in de place, how some people show dey troo colours. Dey shooting at pohlice, dey teefing ting dat cah help dem survive. But ah notice too, when my people teef dey call it ‘looting’, when uddas teef dey call it ‘finding’.

Santimanitay.

Ah hear how Dasheen Bush mudda say dat de free bed an’ coverlet de people getting now is better dan what dey had before. People lorse dey home, dey livelihood, dey family, dey nabel string, but Mammy Bush say dey doing good an’ should be grateful. Yuh doh fine de whole Bush family look lil half-crack?

Santimanitay.

Dasheen Bush take nearly four days to realize dat Katrina hit he own country, not some turd worl’ place. He take four days to realize he should stop reading bout he Petty Goatie and start helping out he citizens. Ah hear he was on holiday AGAIN when Katrina reach. Ah hear how poor Dasheen had to cut he holiday short. He country at war wid Iraq and at war wid Mudda Nature but he on holiday.

Santimanitay.

Ah see how gas price gorn up and dey telling we is becaw Katrina mash up de place. But dat doh make sense to me. Is not barrels of gas dat Katrina mash up. She mash up ah few oil rig dat digging fuh crude oil. Refineries wasn’t mash up, so how come gas price hit nearly six dollars ah gallon dong dey even doh de oil companies have gas ever more fuh we to use? An’ Canada playing monkey see monkey do. 

Sanitmanitay.

Dey have an oil man in de Oval orfice who stand to make plenty profit. But doh say I say eh?

Santimanitay.

De chief in F.E.M.A. start spinning arong in circles like he does drink hard. He talking, giving interview, making speech but not doing de job he was hire to do. Dey fire he tail pronto and all in a sudden dey start telling we he wasn’ qualify to hole dat position in de firs’ place. How dey get dat do?

Santimanitay.

Dey start giving out debit cyard fuh $2000US. Den dey stop. Den dey say dey go post out cheque and direck deposit instead. But de people scatter like beads when yuh costume buss. Banks close, ID lorse. Where dey posting de deposit to? How de people going to cash de cheque?

Santimanitay.

Katrina exposing de land of opportunity for all to see. It exposing de way de bosses does tink. It wash away de glitter and de grins and de double talk and expose de shackles dat was never remove since de olden days. Plenty fingers pointing. Nobody admitting nutting. Dasheen tell we is not a racial situation. But ah bet yuh meh las’ toonie dat if de hurricane did hit Marta Vineyard, he would be dey like quicksilver in a rubber boots toting water and giving out food.

Dey want to stop de media from flimming de corpses and de clean-up. Ah wonder why? Ah doh truss nutting dat Dasheen and he people do.

His’tree go mark dis dong as a nex’ ting dis man do wrong in he time in orfice. My crystal ball doh always wuk good but all meh hair on meh arm does raise when I watch dat man face. He and Chennette resemble two jumbie in pantsuit. Madame Rice only missing one cow foot.

Santimanitay