Is time for Public Relation

By

Queen Macoomeh

Nice! Nice! Ah get plenty letter las’ week when ah write an’ talk ‘bout what Pat Watson say ‘bout we public relation image. People sen’ and say how is chroot. How time an’ again dey take dey nice, clean, respecktable self somewhey and because people only know we from what uddas say, dey get blank.

Dat not fair man.

Is only de wrong what some of we do does get reported. Is only de teefs an’ jammets who representin’ we? Dat cah be right. I doh know who is dem owner. Why Peter mus’ pay for Paul all de time so?

A lady tell me how she went in a job interview wid all she papers to show. De man couldn’t believe one little Caribbean woman could have all dem degree and have all dat intelligenks. He tell she he din know de Caribbean had a University and how he was impress.

But what trouble is dis?

A nex’ fella finish school up here wid flying colours, he head comb, he shoe polish, he pants have a seam yuh could cut orange on it. He tell me how people in work tired say how "he doh look like de res’".

So wh’appen, all ah we fall from a mango tree yesterday? We need to edikate dem outsiders man! We need to show dem who we really is.

If I was to go dong in de Bayou and haul out some no-teet, dotishy looking man who living in a broko-dong shanty house and tell de world how dis is what all outsider look like, ah bet yuh ah go get so much boof, it wouldn’t be funny. Dey would cancel meh passport and pack meh back whey ah born so farse I wouldn’t even have time pack meh grip.

Look how Dasheen Bush use public relation to wrap pretty gift paper on a pile of pure tata and sell it to he own people. De war done since las’ year but bomb still flyin’, coffin coming back home one after de udda. If he could use mamaguy and sweet talk to make people believe he know what de France he doing why we cah use fact and trootful information to show de world de correck image of we?

Somebody tell meh we should akse Miss Rice and Mr. Powell to ack as we public relation consultants. But yuh see dem two? I frighten fuh dem. Once upon a time ah did like Powell too bad. Ah tell all yuh how he look like a decent fella who does talk plain. But ah watching de two’ah dem out de corner of meh eye deze las’ few days.

Powell talkin’ as doh he plate not fittin’ good. Ah still like him eh? But ah not endorsing he coo-coo like before. Ah cah big-up somebody who helping to wrap de tata. As for Ms. Rice. All yuh see she when dey akse she question ‘bout September 11? She spin arong, spin arong like a soucizeb, talk about all kine’ah ting, she bramble, she titivate, she mout’ moving and yuh not hearing a word. When she done yuh tired an’ de question still not answered.

Dem two cah help my image. Ah fine when yuh want a job do good, yuh should do it yuhself or fine somebody in yuh community to do it fuh yuh. Right here in we yard we have people wid enough broughtupsy to represent we.

We should really take dis ting see’rous doh. De hooligan have we reputation parading up and dong in de latrine. When we buil’ a new church or colleck money to pay for some chile operation or pull togedda to start a nice community event ah doh hear nutting.

When we chirren pass dey exam or get a nice wuk or even self help a ole lady to cross de road, ah doh hear nutting. When we doctors and nurses help save somebody life or come up wid new procedure ah doh hear nutting. De outsider papers doh know how to spell we name.

Ah bet yuh din know we have a lovely Haitian doctor in Montreal name Dr. Yvette Bonney who does wuk wid chirren who have blood disease. Ah read about she in las’ mont’ issue of SHE Caribbean magazine. It had plenty more of we good looking, decent, educated people. Stop reading de outsider version of who we is because uddawise yuh going to believe it yuhself.

Main Story Page