Ah tink ah going an' sell mih TV and start watchin’ de cardboard box it come in oui. Believe mih when ah tell all yuh ah trying to put dis war and all de news out mih mine. Ah going about mih day doing mih work but ah cah forget what going on in dis world. Every time ah see Dasheen face on de TV ah does get in a rage. But is not jes’ he.

Yuh ever stop and akse yuhself what it is we doing in troot? Why it is we could see a nice forest - lovely trees and birds buil’ing dey lil nes’ in it an’ ting. De ants an’ all have dey own business to do and we come an’ just destroy de trees to make all kine’ah ting dat we doh really need. Now before yuh jump up an’ boof mih - yes ah know logging is important, but mankine greedy – doh argue dat. We cutting more dan we need and sometime we does cut or burn fuh spite to affeck price and ting. An’ we doh plant back enough.

Den it have we oceans. What a ting eh? We pouring one setta nastiness in it - chemical waste an’ garbage and den we stan’in up wid we mout’ open like de Village Idiot wondering why de fish dead or tase’in funny. New diseases turning up and we doh know where it come from.

Dey telling we de air pollution so bad dat we jook a hole in de ozone layer and how dat is what changing we wedder an’ interfering wid de seasons. Dey say in some years to come, all by New York go be under water when de Nort’ Pole melt away.

We killing de world.

But we doing worse.

We killin’ each udda.

Man if yuh know how ah does get vex when ah talking to people about de murder what going on in Iraq an’ dey telling me about rights of war, or oil, or land or power or a new washecong from Bata. Mih blood pressure does fly up in mih head. Dey talking about dis ting as if is a game of draughts an’ who ever make king get to rule de board.

But is not a new ting. People fighting ever since - for what, Papa Gawd alone know. Is so we treating life so laissez faire.

What it have inside of us dat make we kill fuh spite or destroy fuh greed? Yes ah know is not all of us. It have some who living nice. Yuh see me? I not cravayshous for nobody ting. If you have someting nice I might see it an’ like it an’ ah might even go and buy one likes yours but ah not teefing yours an’ ah not jealousing you. Dat doh mean ah does always eat nice. If you interfere wid mih chile or disrespeck mih family, ah does tun beas’ one time!

Yuh could spot yuh enemy from quite dong de road, but sometime yuh enemy does dress in fren clodding and den crappo smoke yuh pipe because dem so yuh cah spot until dey up in yuh face.

Marley say "we have to fulfil de Book". Well boy dat book have too much ting in it fuh me, oui. We have a violence in we dat does frighten me. An’ when yuh try to fine out de troot, yuh does bounce up all kine’ah propaganda, mamaguy, ole lie, white lie, bole face lie and CNN.

If yuh watch de US news about S.A.R.S. yuh would swear everybody in Toronto have one foot in de grave and de nex’ foot on a banana peel. A lady write an’ akse mih if ah tink it had anyting to do wid de fact dat Canada din join up wid Dasheen to mash up Saddam. I doh know nuh girl. It could jes be dat de US media looking fuh a new story since de war finish or else it could be a plan to remine Canada who is de man rat. People like you an’ me would never fine out deze tings.

Somebody tell me a time dat human beans is like a virus in de world. Yuh know how yuh computer does get a virus and kill out yuh files and make yuh lorse important tings? Dat is how we going. We destroying some tings dat we doh know how to fix back. We destroying peace and honesty and trust.

20022003