The Chancellor's Email

Hear Nuh

Ah know it have somma all yuh ready tuh boof meh about one ting or de udder about my University. Dat is fine, but understan one ting. DIS SITE IS MINES!! If ah use somebody snap, ah akse dem firs. If ah use a lil piece'ah tune is because ah honouring we music. Do for gawd sake doh get yuh bottom lip pull up over yuh head. I try my bes to give respeck. 

Yuh hatta remember I leave home since Columbus fall off de boat. Dis site is my way of tryin an recapture meh "Trininess" (doh laugh nuh). Dis is my way of makin sure ah could pass on a lil history to meh chirren. Bear wid meh.

Doh expeck me to have manners all de time nidda. In my islands a lil rudeness is acceptable. By rudeness ah doh mean porno or filth eh so GO AWAY if is dat you come looking for! Go an fine all dem nasty people an dem site. By rudeness I mean two lil green verb but not de big macco ones. Doh mine eh? Is all in fun. Because if is one ting my people know, is how to have FUN. An to all meh Tobagonian brudders and sistahs. When I say Trini all yuh KNOW I mean all ah we right? I doh make joke when it come to meh family.

An hear nuh, if yuh want to copy anyting akse. I usually say yes...all all yuh fowl teef who feel de internet is a free-co have some respeck. De same way I bus meh brain an make someting, is de same way yuh could at lease leh meh know yuh borrow it.

Awright, go an take yuh online degree at Commess University.

Walk good eh?

Queen Macoomeh, Chancellor