|
Word! By Queen Macoomeh
Copyright October 2007
I doh know if all yuh did hear bout de commotion in Montreal de udda day. Apparently a white studient was in a Burger King an a group of about 15 studients, mose of dem black, pelt ice cubes behine she. De white studient tun arong an buss a racial word an de udda studients haul she an she fren in a park an drop two planass in dey skin. I wasn dey eh but ah hear how it was war between de two schools. One school name Lester Pearson wid mosely white, English speakin studients an de nex one was Henri Bourassa wid mosely black, Haitian studients. Somebody tape de whole fight an it lan up on de internets. Ah hear school windows get mash up an it was real bacchanal. De studients between de ages of 14 an 16 was charge wid assault. De white student say she did cuss dem wid de racial word after dey pelt she. Tension in de place. One word eh? Ah hear a macoomere of mines say some time aback dat ‘words have heft’. Is troot. All de gun an bomb it have to kill an maime yuh body but when yuh dead yuh dead. On de udda han, it have one word dat does raise up an kill people over an over again. We human goin to de moon, we explorin de bottom of de ocean, we want to make contack wid alien but we cah even get along wid we own specie. We have one word to upset de apple cart on a daily basis. If I was a alien an pass troo an see people gettin on so dotish I passin dis planet like a full bus oui. Me en stoppin here at all, at all. I go say to mehself “look dem cah even greet one anudda in a decent fashion, who is me to lan my good space ship here fuh dem to ben meh antenna an massacreet meh lil green behine? No sah! Why I would lan dey when look dem how dey killin each udda over oil while it have udda resource to use fuh energy. Look dey allowin big company to dutty up dey own ocean, air an water supply – fuh what? So dey could trade big on NASDAQ? Look how dem fightin over lan while it have nuff planet out here to give each man one fuh heself. Look how dem covetin gole an dollars but yet still dey go dead an lef de pile-ah cacadah right dey. Dey killin men like Ghandi an Martin Luther King Jr. but eleckin men like Dasheen Bush an Bad Mood Ahmadinejad. Dey could fine out what colour drawers a man from Quito Quito buy wid a credit card in Walmart lass week Monday at 3:12pm, but cah trace a video link from Bin Laden. Human beans not too right in dey head nuh. Dey priorities upsidy dong.” All de black dis an white dat hamperin we progress. All now so if we was wukkin hand in hand we wudda have solution to we global problems. Ah hear a white man say “send dem back!” as if de slaves beg dem please to chook dem in a ship bottom an bring dem over here. Ah hear a black man say “ah changin meh name from John to Rootsman!” but he not givin up he big wuk in a Fortune 500 company to go back an plant peas in Tobago. Ah hear dem companies who chargin $100 fuh you to sen yuh spit so dey could see whey yuh DNA come from is a real joke. Ah hear if yuh sen five spit to five company yuh go hear how yuh DNA come from five diff’rent places. Dey makin people a pappyshow. Black people lorse dey roots an now tryin to fine it so it have businesses springin up to give dem a six fuh a nine. And de worse part is dat dem company own by black people fuh de mose part. What a ting! Bobol does come in all colours eh papa! But wid all de civilization an emancipation an democrazy, human beans still cah handle a word. As fuh me. Me en like it. Ah doh use it because wid all de talk dey talk, dat word have heft an I not carryin dat weight wid me where I goin. Yuh cah walk good when yuh carryin weight like dat. It does only slow yuh dong. One word eh papa. Six letters weighin a ton.
|
